Ramadani tregon se a do të kthehet Oto John te Prishtina

Pas ndeshjes së sotme mes Prishtina dhe Besës që përfunoi me fitoren e thellë të bardhekaltërve, trajneri i Prishtinës, Zekirija Ramadani, shfrytëzoi rastin për të sqaruar rastin e sulmuesit Oto John i cili ka mbetur në vendlindje dhe nuk është kthyer ende te Prishtina.

“Ai është futbollist i Prishtinës. Me të vërtetë ne nuk i japim aq shumë rëndësi sa i jepin mediet. Ai është lojtari ynë. Presim që të pajiset me pasaportë dhe të kthehet. Këto janë lajmet e fundit dhe lajme që mbeten deri në fund gjersa të kthehet Oto John-i. Sigurisht që ai është i rëndësishëm për ne, por kur të vjen do të shikojmë se si është situata”, ka thënë Ramadani për kanalin transmetues të ndeshjes, Artmotion.

RAPORTI I NDESHJES

Ndërkaq, lidhur me ndeshjen ku Prishtina fitoi me rezultat 5-1, Ramadani tha: “Duke marrë parasysh që edhe fusha ishte mjaft e vështirë dhe me borë, që nuk na konvenon neve me lojën e duhur, uroj futbollistët që u ambientuan shumë shpejt në këtë fushë. Uroj futbollistët për fitoren, edhe pse pak na e prishi qejfin ai pranimi i golit, por sido qoftë 3 pikët janë vendimtare. Në këto kushte sic ishin sot, me të vërtetë dhanë maksimumin secili futbollist”.