Reina në Bayern

Gjiganti bavarez, Bayern Munchen, do të bëhet me portier të ri në stinorin vijues. Spanjolli Pepe Reina, jo se do të mund t’ia zë vendin kampionit botëror, Manuel Neuer, por do të jetë një zëvendësim tejet cilësor për gjermanin - që mund të kërkojë pushim ndonjëherë. 

“Po, kemi arritur marrëveshje. Reina është portieri ynë i ri. Ai ka përvojë të madhe dhe ka pranuar të vi në Munchen përkundër se Neuer është numri një i portës sonë,” ka thënë Karl-Heinz Rummenigge (shefi ekzekutiv i Bayernit) për PA Sport sot, duke u lajmëruar nga Portlandi i Oregonit të SHBA-ve, ku Bayern po kalon fazën përgatitore. 

Spanjolli 31 vjeçar do t’i kushtojë Bayernit 2 milionë funta. Në stinorin e fundit, Reina i ndihmoi Napolit që të përfundojë në pozitën e tretë të Serie A dhe të kualifikohet për në Ligë të Kampionëve.