Rivalja e Kosovës, Ukraina tregohet e fortë ndaj Gjermanisë

Rivalja e Kosovës në kualifikime për Eurobasket 2017, Ukraina, është treguar arrë e fortë për Gjermaninë në miqësoret e zhvilluara në ditët e kaluara.

Ukraina në përballjen e parë (të zhvilluar pardje) ka befasuar Gjermaninë, duke e mposhtur me rezultat 77-83, ku është dalluar Olexandr Mishula me 22 pikë të shënuara në këtë fitore.

Përveç tij në këtë ndeshje janë dalluar edhe Vyacheslav Bobrov me 14 dhe Artem Pustovyi me 9 pikë të shënuara.

Sidoqoftë, në miqësoren e radhës (dje), Gjermania ka arritur të këndellet, kur në saje të lojës së mirë në mbrojtje ka ndalë ukrinasit në 54 pikë, duke shënuar 62, ku Danilo Barthel ka qenë më efikasi me 12 të shënuara për gjermanët, në fitoren 62-54.

Kosova do të pret Ukrainën më 3 shtator, ndërsa do të zhvillojë ndeshjen e kthimit atje më 14 shtator.