Rivera nxjerr pikë për Llapin në Gjilan

Gjilani i Zekirija Ramadanit tashmë tre xhiro nuk ka shënuar fitore, ndërsa sot atë ia ka mohuar Francisco Rivera i cili ka shënuar një minutë para fundit të kohës së rregullt të ndeshjes, për të dhënë përfundimtaren: Gjilani 2-2 Llapi [Albert Dabiqaj 3, Shend Kelmendi 61 - Fernandinho 16, Francisco Rivera 89].

Gjilani ka qenë dy herë në epërsi sot, por nuk ia ka dalë të fitojë ndeshjen. Albert Dabiqaj në formë (3), i ka dhënë epërsinë Skifterave që në fillim të ndeshjes, kur shënoi pas asistimit të Elton Cales. Por, me një gol nga gjuajtja e lirë braziliani i Llapit, Fernandinho barazoi (16)!

Më pass, Dabiqaj (24) u desht të lë fushën për shkak të një lëndimi, ndërsa Baton Zabërgja shënoi, por goli i tij u anulua për pozitë jashtë loje (33). Pak para fundit të pjesës së parë iu shtuan telashet edhe më Ramadanit, i cili tashmë detyrueshëm zëvendësoi edhe Egzon Sinanin (45+2). Në pjesë të dytë, erdhi goli tjetër i epërsisë për gjilanasit.

TABELA AKTUALE

Ka qenë zëvendësimi i dytë Oltion Bilalli që asistoi për Shend Kelmendin (60), ndërsa ky riktheu epërsinë e Gjilanit. Llapi në anën tjetër riktheu koncentrimin në fushë për të kërkuar barazimin, ndërsa në minutën e 89 të ndeshjes meksikani Rivera barazoi me një gol të bukur, se ndryshe s’mposhtej Enea Koliçi.

Zekirija Ramadani u shpreh të jetë i kënaqur me pikën në ndeshjen e sotme, derisa Gjilani i treti në renditje ka 40 pikë nga 26 ndeshje me pozitën që dërgon në kualifikime për Ligë të Konferencës. Llapi në anën tjetër dukej i zhgënjyer me barazim, siç tha Tahir Batatina pas ndeshjes, ndërsa ekipi është i pesti në renditje me 33 pikë nga 26 ndeshje.

Skuadrat tani do të kenë dy javë pushim nga ndeshjet zyrtare, për shkak të dueleve të kombëtareve për kualifikime drejt EURO 2024, ndërsa do t’i rikthehen ndeshjeve kur Gjilani udhëton te Ballkani, ndërsa Llapi do të pret Malishevën gjatë datave 8/9 prill.