Shqipëria Ferrari, Zvicra Red Bull

Strategu italian i Shqipërisë, Gianni De Biasi, në një intervistë të dhënë për shqiptaren Panorama Sport ka bërë të ditur se Shqipëria në fillim të kualifikimeve ishte një makinë si Ferrari, përkundër se kishte përballë një makinë të Red Bullit. Gabimet në pit-stop dhe në goma, bënë që Shqipëria të përfundojë në vendin e pestë, ka thënë 57 vjeçari. 

“Makina me emrin Shqipëri në fillim të kualifikimeve ishte një Ferrari, e përpara kishte një tjetër me emrin Red Bull, sa për të bërë një paralele. Më pas Ferrari kishte probleme me gomat, apo edhe gabimet e bëra në pit-stop na sollën këtu ku jemi sot. Mirëpo, mos harroni, edhe ai Red Bulli, që konkretisht është Zvicra, ka pesë vjet që po punon për të ardhur këtu ku është dhe nëse ia shton faktin se ka 10 futbollistë shumë më të mirë se skuadra jonë,” ka thënë De Biasi për të përditshmen Panorama Sport gjatë intervistës ndër të tjera. 

Shqipëria ishte e dyta në Grupin E deri në ndeshje me Norvegjinë kur barazimi në Tiranë solli zhgënjimin pas së cilës filluan rëniet dhe humbjet, duke përfunduar në vendin e pestë të grupit me gjashtë përfaqësuese.