“S’ka sekret. Po luaj dhe po shënoj”

Sulmuesi i kombëtares shqiptare dhe i skuadrës së Zurichut, Armando Sadiku, ka treguar performancë të lartë në dy ndeshjet e fundit të kampionatit zviceran.

Sadiku, pasi shënoi golin e fitores javën e kaluar ndaj Luzernit, këtë javë kontribuoi me një gol dhe një asist në fitoren e skuadrës së tij ndaj Grasshopperit, që përfundoi me rezultat 4-3.

Duke i arsyetuar paraqitjet e tij të mira, sulmuesi nga Elbasani tha për sportal.al se nuk ka asnjë sekret, por thjeshtë aktivizimi i tij në lojë, po sjell edhe gola.

“Po luaj dhe po shënoj. Këtu s’ka asnjë sekret. Më përpara nuk aktivizohesha, kështu që dhe mundësitë për të shënuar ishin të pakta,” tha Sadiku.

Me ndihmën e Sadikut në dy fitoret e fundit, skuadra e Zurichut arriti të sigurojë një vend për Europa League në stinorin e ri.

Pjesë e Zurichut janë edhe dy futbollistët e tjerë shqiptarë, Burim Kukeli dhe Berat Xhimshiti.