Super çereku i katërt s’mjafton, mposhtet Bashkimi

Pas humbjes nga Kozuvi në ndeshjen e parë, Bashkimi është mposhtur edhe në takimin e dytë të Grupit A të Ballkan Ligës.

Prizrenasit u mposhtën sonte nga skuadra e Kumanovos në ‘Sezai Surroi’, në një takim ku mysafirët ishin dominues që nga fillimi, mirëpo Bashkimi nuk u dorëzua deri në fund, duke bërë që takimi të mbyllej me vetëm 3 pikë diferencë.

Pasi e nisi jo mirë takimin, Bashkimi u këndell paksa në çerekun e dytë duke shënuar plot 22 pikë, ndërsa një ringjallje e madhe erdhi në çerekun e fundit të takimit, çerek në të cilin Bashkimi shënoi 17 pikë më shumë se kundërshtari, mirëpo ishte vonë, pasi që mysafirët veçse e kishin krijuar epërsinë solide dhe i duhej vetëm menaxhimi i mirë i kohës.

Duhet përmendur që rol vendimtar në rezultatin e takimit luajti saktësia e mysafirëve nga gjuajtjet për 3 pikë. Skuadra e Kumanovos e mbylli takimin me 11 trepikësha të shënuar, 5 prej tyre nga kapiteni Aleksandar Kostoski.

PERFORMANCAT

Më të dalluarit për Bashkimin në këtë takim ishin Kejuan Jonhson me 25 pikë, 6 kërcime e 7 asistime, Gazmend Sinani, i cili realizoi dyshifror të dyfishtë me 15 pikë e 10 kërcime,, Kayel Locke me 14 pikë, 7 kërcime e 1 asistim dhe Mikaile Tmusic me 12 pikë, 2 kërcime e 2 asistime.

Për mysafirët u dalluan Miladin Pekovic me 21 pikë, 5 kërcime e 3 asistime, Aleksandar Kostoski me 20 pikë, 7 kërcime e 5 asistime dhe Marjan Janeski me 10 pikë, 4 kërcime e 2 asistime.

RENDITJA TABELARE

Pas 2 ndeshjeve në Grupin A, Kumanovo ka 2 fitore, ndërsa Bashkimi 2 humbje.

Xhiron e ardhshme, Bashkimi luan ndaj Beroes në Bullgari, kurse Kumanovo luan ndaj Prishtinës në kryeqytet.

GRUPET DHE REZULTATET - BALKAN LEAGUE

BASHKIMI

KUMANOVO