Tirana “lëshon” titullin nga duart, Partizani pranë tij

Ditë e çmendur në futbollin e Shqipërisë!

Ndonëse u mendua se Tirana do ta fitonte titullin kampion pasi nuk u mposht në derbin direkt nga Partizani, rezultatet e ditës së sotme kanë bërë që tashmë Partizani të jetë shumë pranë titullit, kur ka mbetur edhe një xhiro deri në fund.

Partizani sot e fitoi 1-4 ndeshjen ndaj Kastriotit, kurse Tirana befasisht u ndal 2-2 nga Bylisi në shtëpi.

Barazimin Bylisi e gjeti përmes një penalltie në minutën e 87’, penallti e cila nxiti reagime të shumta të tifozërisë dhe lojtarëve vendas, duke e ditur që ajo penallti mund të jetë fatale për ta në humbjen e titullit kampion.

TABELA AKTUALE

Rrjedhimisht, falë rezultateve më të mira në përballjet direkte, Partizani tashmë ka kaluar në krye me 64 pikë, aq sa ka edhe Tirana.

Tashmë gjithçka është në dorën e Partizanit. Për ta fituar titullin kampion, Partizanit i mjafton një fitore në ndeshjen e fundit të kampionatit ndaj Teutës në shtëpi, e Tirana ndeshjen e fundit e luan në udhëtim te Erzeni.