UEFA-ja në telashe

UEFA-ja dha vendimin sot. Serbia u shpërblye me fitore, por pa pikë. U gjobit me 100 mijë euro, sa edhe kombëtarja. 

Mirëpo, asnjëra nga palët nuk është shprehur e kënaqur pas këtij vendimi të shtëpisë europiane të futbollit. 

Derisa kuqezinjtë ndihen të shkelur deri në rrënjë, serbët pyesin si është e mundur t’iu mirren pikët e fitores në tavolinë! 

Ankesat e FSHF

Në komunikatën e FSHF-së thuhet që ndëshkimet janë të padrejta, sepse barazojnë dënimet. Gjithashtu, lojtarët shqiptarë nuk u njoftuan kurrë që zyrtari i ndeshjes vendosi që takimi të vazhdonte. Shqipëria nuk refuzoi kthimin në ndeshje. Nuk ka asnjë raport ku thotë se arbitri i ndeshjes ka vërtetuar sigurinë e rikthyer në stadium dhe thirrjen për kthim në ndeshje.  

Ankesat e FSS

Në anën tjetër, serbët pyesin: Nëse gjatë turbulencës së katër viteve më parë në Itali, vendasi u shpërblye me fitore në tavolinë (Italia) dhe mysafiri (Serbia) u dënua që të zhvillojë ndeshjet si vendas pa tifozë dhe gjobitje në të holla, atëherë si është e mundur që tash Serbia të fitojë ndeshjen, që do të thotë janë të pafajshëm dhe të gjitha dënimet tjera, si gjobat, pikët, t’i ipen prapë Serbisë! Çka nëse do të ishte ndeshje barazhi kjo?! Për më tepër, asnjëherë në histori të kualifikimeve nuk ka ndodhur që një ekip që fiton ndeshjen zyrtarisht, t’i mirren edhe pikët. 

Zgjidhja

I tërë epilogu i kësaj, jo vetëm nga ana e Shqipërisë që u përmbys tërësisht me këtë vendim, por edhe nga ana serbe, do të thotë që UEFA-ja me këtë vendim - i ka hapur telashe më shumë se kurrë vetes, derisa Michel Platini tash e tutje do të ketë punë shumë të madhe e ndoshta do të vie në pyetje edhe pozita e tij, për shkak të animit të shprehur hapur në deklarata para vendimit të UEFA-së. 

UEFA-ja vështirë se do të mund t’i kënaq të dyja taboret pas ankesave të para dhe nëse shkohet në ankesë te Gjyqi Arbitrar Sportiv, CAS, atëherë do të mund të presim një vendim - ndoshta të drejtë për kuqezinjtë.