7 gola, 2 përmbysje, Llapi në gjysmëfinale

Pas Drenicës e Besës, skuadra e tretë gjysmëfinaliste e Kupës së Kosovës është Llapi.

Në takimin e luajtur në ‘Zahir Pajaziti’ të Podujevës, dashamirët e futbollit vendor ishin dëshmitarë të një ndeshjeje shumë të bukur, e cila prodhoi plot 7 gola dhe 2 përmbysje të rezultatit, e në fund kualifikimit iu gëzuan llapjanët, falë golit të Berat Hysenit në minutën e 93’, pasi që skuadrat u detyruan të luanin në vazhdime, me kohën e rregullt prej 90 minutave që u mbyll 3-3.

Seria e golave u hap në minutën e 38’, kur Festim Krasniqi u tregua i saktë nga pika e bardhë. Menjëherë pas këtij goli, llapjanët e gjetën edhe dyfishimin e epërsisë me Berat Hysenin që shënoi pak minuta pas inkuadrimit nga banka rezervë. Mirëpo, prizrenasit nuk lejuan që të shkonin në pushim me disvantazh prej dy golave dhe golin e parë të tyre për këtë takim e gjetën përmes Blendi Memajt, i cili realizoi një gol të bukur nga gjuajtja e lirë.

Në pjesën e dytë, Liria u tregua skuadër më ofansive, ndërsa përmbysjen e përkohshme të takimit e arriti me 2 golat ‘ekspres’ të Henry Chibuezes, i cili shënoi në minutat 56’ e 58’ për rezultatin 2-3. Gjithsesi, kjo epërsi nuk zgjati shumë, me vendasit që barazuan përmes Fuad Karabegut në minutën e 65’. Pak minuta pas golit të Llapit, Liria mbeti me 10 lojtarë në terren. Ishte Rron Gashi ai i cili u përjashtua nga loja në minutën e 70’ të takimit pas dy kartonëve të verdhë, e kjo e bëri edhe më të lehtë punën për skuadrën e trajnerit Batatina.

Më pas, gola të tjerë nuk pati dhe koha e rregullt u mbyll 3-3 e skuadrat u detyruan t’i luanin 2 vazhdime nga 15 minuta.

Me të filluar vazhdimet, ishte Berat Hyseni ai i cili shënoi për 4-3, për t’i dhuruar epërsinë vendasve, epërsi e cila u mbajt deri në fund, përkundër tentimeve të prizrenasve përmes Liridon Fetahajt e Henry Chibuezes në vazhdim të kohës shtesë.

Skuadra e katërt gjysmëfinaliste do të përcaktohet nga dueli i nesërm mes dy Trepçave, derisa shorti për çiftet gjysmëfinaliste mbahet të premten.