Arlind Veliu (Malisheva) - Ylli i javës (1)

Federata e Futbollit e Kosovës dhe sponsori i Superligës, Albi Mall edhe këtë edicion do të ndajnë çmimin “Ylli i Javës”. Në xhiron e 1-rë të Albi Mall Superligës ky çmim i ka takuar mbrojtësit të KF Malisheva, Arlind Veliu.

Komisioni i veteranëve të futbollit në përbërje: Bujar Guta, Shyqeri Salihu dhe Lulzim Rrmoku, vendosi që epiteti i më të mirit për këtë xhiro t’i takojë mbrojtësit të skuadrës malishevase, pasi në ndeshjen kundër Dukagjinit ai ishte i pakalueshëm, por shumë i dobishëm edhe në fazën ofanzive, duke shënuar golin e vetëm në ndeshje që ia mundësojë FC Malisheva t’i gëzohet fitores dhe t’i arkëtojë 3 pikët e para në Albi Mall Superliga edicioni 2023/24.

Çmimin “Ylli i Javës” për futbollistin e KF Malisheva, Arlind Veliu e ndau Erjona Musliu, menaxhere e marketingut në Albi Mall.

Pasi mori këtë çmim, Veliu u shpreh i lumtur që skuadra e tij e nisi mbarë edicionin e ri garues në elitën e futbollit në Kosovë.

“Ndihem shumë mirë dhe i lumtur për këtë vlerësim dhe dua t’i falënderoj bashkëlojtarët e skuadrës dhe shtabin teknik pa të cilët sigurisht se nuk do të mund ta fitoja këtë çmim. Malisheva ka nisur me fitore këtë kampionat dhe shpresoj që të na shkoi mbarë i tërë kampionati. Skuadra jonë ka pasur shumë ndryshime gjatë afatit kalimtar të verës, andaj na duhet akoma kohë që të komponohemi dhe të arrijmë të luajmë sipas filozofisë së trajnerit. Por, jemi shumë të motivuar dhe atmosfera në ekip është shumë e mirë”, ka thënë Arlind Veliu për faqen zyrtare të FFK-së.