Batatinës do t’i mungojnë tifozët

Kryetrajneri i KF Llapit, Tahir Batatina, në një postim në llogarinë e tij në Facebook është shprehur se përkundër që po nis Superliga dhe do të zhvillohen 11 xhirot e fundit të kampionatit, ai do të ndjej mungesën e tifozëve të klubit, “Legjendat”.

“Ne futemi në 11 ndeshjet e radhës për të aplikuar lojëra të mira por shpresa dhe kërkesa ime është për ju tifoza, pasi që ju jeni motivi i zejes sime dhe lojtarëve në fushë,” ka shkruar Batatina.

Federata e Futbollit të Kosovës (FFK) ka marrë leje nga Ministria e Shëndetësisë dhe ajo e Sportit për të rifilluar stërvitjet duke respektuar protokollin mjekësor për mbrojtje ndaj COVID-19.

Më pas, është përcaktuar që ndeshjet të zhvillohen pa shikues dhe sipas orarit që kanë paraparë organet e FFK-së, që do të zhvillohen prej 7 qershor deri më 25 korrik.

Llapi në xhiron e XXIII të Superligës do të ndeshet ndaj Dukagjinit, që është i fundit në tabelë dhe vështirë që do të shpëtojë stinorin në elitë.

Ekipi i Batatinës në anën tjetër po kërkon mundësinë për të kapur garat evropiane prej ligës, pasi që në Kupë janë eliminuar më parë.