Celina: Gati për të startuar, Championship më i fortë se Eredivisie

Përmes një deklarate të dhënë për BBC, Bersant Celina ka treguar se ndihet i gatshëm për të qenë startues te skuadra e Ipswichit në Championship.

Sulmuesi i përfaqësueses së Kosovës, që te Ipswich është i huazuar nga Manchester City, këtë fillim të sezonit e ka startuar nga banka rezervë, mirëpo kjo nuk e pengoi që të shënonte një supergol xhiron e kaluar.

“Ishte e vështirë për mua që të qëndroja në bankën rezervë, mirëpo mendoj se koha ime do të vijë në ndeshjet e ardhshme.

Mendoj që trajneri beson te unë dhe ai po e pret kohën e duhur që unë të jem startues. Kam qenë pak i sëmurë dhe kjo më pengoi, mirëpo skuadra po luan mirë.

Liga është më fizike dhe më e shpejt këtu, prandaj mund të them që është një ligë më e fortë sesa Eredivisie holandeze. Njerëzit mendojnë që unë nuk jam një lojtar që mund të luaj këtu për shkak të gjatësisë, mirëpo mendoj që kam teknikë dhe aftësi që të jem i suksesshëm këtu, vetëm duhet të punoj shumë.” - ishin fjalët e Bersant Celinës, njofton BBC.

Ndeshjen e ardhshme Ipswichi e zhvillon të shtunën ndaj Boltonit me fillim nga ora 16:00.