Challandes: Kurajo, punë, s’ka shumë skuadra që kanë aq raste ndaj Spanjës

Përzgjedhësi i Kosovës, Bernard Challandes, ka thënë se është i lumtur me përparimin që ka bërë ekipi dhe lojën e madhe të treguar ndaj spanjollëve sonte, përkundër humbjes 0-2.

Kosova pati katër raste të mira në ndeshje, që nuk i shfrytëzoi ndaj Spanjës, derisa Spanja zotëroi topin në 70 përqind të lojës.

ORARI I NDESHJEVE dhe TABELA AKTUALE

“Uroj ekipin për këtë lojë të madhe. Taktikisht ishim shumë mirë, të mirë në mbrojtje dhe në përgjithësi. Tentuam të shënojmë, luajtëm me kurajo, por nuk shfrytëzuam rastet që i kishim,” ka thënë fillimisht selektori Challandes.

“E kishim planifikuar të mbrohemi ndaj Spanjës dhe pastaj me kundërsulme të shënojmë. I gjetëm ato dhe atë shumë mirë. Jo shumë skuadra arrijnë të krijojnë kaq raste ndaj Spanjës. Ne nuk u frikësuam fare përkundër fuqisë së kundërsharit,” ka shtuar ndër të tjera Challandes që ka thënë se është i lumtur me punën që po e bën me këtë ekip, që po përparon për të mirë.

Kosova me humbjen e sontme ka rënë në pozitën e katërt, të parafundit në grup, pasi që Greqia në anën tjetër ka mposhtur Suedinë. Kosova ka vetëm një fitore në këtë grup, ndaj Gjeorgjisë së fundit në klasifikim. Nga tri ndeshjet e muajit shtator, Kosova ka marrë 4 pikë.