Dita e pestë e evropianit, dita e grupit “të vdekjes”

Për dallim nga katër ditët e para të kampionatit, sot Kampionati Evropian sjell vetëm dy ndeshje.

Sot në fushë zbret favoriti kryesor i kampionatit, Franca, si dhe Portugalia e Cristiano Ronaldos bashkë me Gjermaninë e Joshua Kimmichit e Leroy Sanes.

GRUPET - EURO2020

Me fillim nga ora 18:00, Portugalia përballet me Hungarinë, përfaqësuese të cilat na dhuruan atë barazimin e famshëm 3-3 në Evropianin e viti 2016. E më pas në ora 21:00, Franca përballet me Gjermaninë.

Që të dyja ndeshjet i takojnë Grupit F, grupit më interesant të këtij kampionati evropian.

Normalisht, që të trija përfaqësueset “e forta” të grupit do të duan që ta mposhtin Hungarinë, “autsajderin” e grupit, e pastaj ta kërkojnë kualifikimin në përballjet direkte mes tyre.

Sipas parashikimeve, favoritja për ta kryesuar grupin llogaritet Franca, kurse vendi i dytë mendohet se do të jetë luftë mes Portugalisë e Gjermanisë. Megjithatë, mbetet të shihet se çfarë do të ndodhë.

Pas ditës së sotme, nesër fillojnë ndeshjet e dyta të grupeve përkatëse të Evropianit, pas të cilave gjërat do të qartësohen edhe më tepër.