E 100-ta me Kosovën

Përzgjedhësi i përfaqësueses turke, Fatih Terim, është duke e shënuar numrin jubilar të 100-të, të drejtimit të Turqisë në ndeshje ndërkombëtare. 

E kjo do të ndodh pikërisht sot në ndeshje me Kosovën për të cilën ai tha: 

“T’i regjistrosh 100 ndeshje si trajner i një përfaqësueseje nuk është lehtë. Kjo është raritet edhe në botë. E 100-ta qëlloi këtu. Herën tjetër, dua që kur të luajmë me Kosovën, vëllezërit tanë të dalin me flamuj dhe të intonojnë himnin e tyre, pas pranimit të plotë në FIFA e UEFA,” ka thënë Terim, i cili udhëhiqte Galatasarayin para se të merrte drejtimin e përfaqësueses turke. 

“E njëqindta i binte të jetë ndeshja me Irlandën, por tash pasi që Kosova hyri në mes, do të mbetet një kujtim tepër i mirë te unë, të regjistroj këtë jubile në një vend që e ndjej si timin,” ka përfunduar Terim komentet e tij për ndeshjen historike të tijën që do ta zhvilloj sot. 

Përzgjedhësi i përfaqësueses turke disa herë ka cekur se kjo është së pari ndeshje vëllazërore, pastaj edhe miqësore dhe se përkundër se nuk e kishin planifikuar, me të ardhur oferta për miqësore nga Kosova dhe pas takimit, nuk ka hezituar askush që të pranojë ofertën për këtë ndeshje. 

Ai ka potencuar dje gjithashtu, se kjo ndeshje do të jetë mesazhi më i mirë për UEFA-në dhe FIFA-në se duhet pranuar Kosovën në rrjetin e tyre me të drejta të plota.