Edhe një lojtar i Lirisë, kalon te FC Suhareka

I ardhur në janar të vitit 2023 te Liria, ku me përvojën e tij nga Feronikeli, Prishtina e Besa, ndihmoi skuadrën që të arrijë Superligën, edhe Qemail Elshani është ndarë me ekipin prizrenas, për të kaluar te ekipi me emër të ri në futbollin kosovar, FC Suhareka.

Skuadra në fjalë ka zyrtarizuar dje mesfushorin me përvojë, me të cilin ka arritur marrëveshje për sezonin 2023/24 ndërsa pos tij ata kanë prezantuar edhe Arijanit Kuqi (portier, ish-lojtar i Rahovecit, Ballkanit e Lirisë) si dhe Erion Kuqin (qendërmbrojtës, ish-lojtar i Besës dhe Dardanisë së Qyshkut).

“Ju njoftojmë që njëri ndër mesfushorët më kualitativ të futbollit kosovar QEMAJL ELSHANI ka arritur marrëveshje me klubin tonë për të arritur synimet dhe objektivat tona.
Elshani vie pas një sezoni fantastik në Prizren te KF LIRIA ku arritën inkuadrimin në superligë duke ndihmuar klubin me gola e shumë asistime , Qema ndryshe është kampion i Kosovës me skuadrën e KF Feronikeli duke i fituar të gjitha trofetë e mundshme me skuadrën nga Drenasi dhe gjithashtu fitues të kupës me skuadrën e KF Besa e FC Prishtinën gjithashtu ka mbrojtur ngjyrat edhe të ; KF Drenica , KF Drenasi ,  etj.
Me ardhjen e Qemajlit mesfusha jonë bëhet edhe më e fortë duke shpresuar që të bashkuar mund ti arrijmë sukseset e rradhës.” - ka shkruar ndër të tjera njoftimi i FC Suhareka lidhur me ardhjen e Elshanit në ekip, derisa në fund ka bërë të ditur se ende do të ketë të reja në skuadër.

Elshani bëhet kalimi i radhës te Suhareka prej Lirisë së Prizrenit që do të luajë në Superligë këtë stinor. Më parë, nga Liria te ky kaloi edhe sulmuesi Astrit Berisha si dhe qendërmbrojtësi Dardan Jashari. ◼️