Erik ten Hag zyrtarisht i Manchester Unitedit

Manchester United ka zyrtarizuar atë që u tha disa ditë më parë dhe tashmë prej 1 korrikut të vitit 2022 deri më 30 qershor 2025 - Erik ten Hag do të jetë timonier i skuadrës së Djajve të Kuq.

Holandezi Ten Hag në kontratën e nënshkruar ka edhe opcionin për vazhdim të marrëveshjes edhe për një vit tjetër shtesë.

“Në katër vitet e fnudit te Ajax, Erik ka dëshmuar veten duke qenë ndër trajnerët më të suksesshëm në Evropë dhe më atraktiv, për futbollin e luajtur, atë sulmues dhe vendosmërinë për punën me të rinj,” ka thënë John Murtough, drejtor futbolli në “Old Trafford”. “Gjatë bisedës me Erikun para emërimit të tij, kemi qenë të impresionuar thellë nga vizioni i tij afatgjatë për të kthyer Manchester Unitedin në nivelin ku të gjithë dëshirojmë të garojmë, por edhe impulsivitetin e tij për të arritur këtë.”

Ndërsa vetë holandezi në deklaratën e tij dhënë për faqen zyrtare të Manchester Unitedit ka shprehur entuziazmin për sfidat që e presin në detyrën e tij te klubi i ri.

“Nder dhe kënaqësi të emërohem trajner/menaxher i Manchester Unitedit. Jam jashtëzakonisht i emocionuar për të nisur sfidat që na presin. E di historinë e këtij klubi të madh dhe pasionin e tifozërisë dhe jam absolutisht i vendosur për të zhvilluar një ekip që të sjellë suksesin që e meriton,” ka thënë holandezi 52-vjeçar, që pret lejen e punës në Angli, për të udhëtuar dhe për të përfunduar formalitetet brenda në zyret e klubit.