Favoriti eliminohet pas penalltive

Për të përcaktuar gjysmëfinalistin e dytë të Kupës së Kombeve Afrikane, nuk kanë mjaftuar as 120 minuta lojë.

Derbi ndërmjet Senegalit dhe Kamerunit ka vazhduar pa gola edhe pas 90 minutave dhe as vazhdimet nuk dhanë fitues për tu vendosur gjithçka pas serisë së penalltive.

E aty, Kameruni doli më i saktë, pasi që penalltinë e Sadio Manesë së Senegalit e mbrojti portieri i Kamerunit, Fabrice Ondoa, ndërsa vendimtaren e shënoi sulmuesi i Besiktasit, Vincent Aboubakar për të siguruar gjysmëfinalen për vendin e tij, Kamerunin, 5-4.

Senegali llogaritej favorit i Kupës së Kombeve, por Kameruni sonte ka ditur të izolojë sulmet e senegalezëve ndërsa në penallti janë treguar të shkëlqyeshëm.

Përveç vetes, Senegali s’ka kë ta akuzojë për këtë eliminim të papritur.

Kameruni në gjysmëfinale pret fituesin e ndeshjes Gana-Kongo.