FITORE PËR RUAJTJEN E KREUT
Feronikeli’74 dominon për të mposhtur Istogun
15 April, 2023 @18:18
Feronikeli’74 i është kthyer fitores pas humbjes më të thellë të stinorit të pësuar nga Liria në xhiron e kaluar. Ekipi i drejtuar nga Granit Begolli me rezultat 3-0 ka mposhtur Istogun sot në Rexhep Rexhepi, ndërsa skuadra e Feronikelit’74 ka mbajtur distancën 4-pikëshe ndaj Lirisë ndjekëse.
Pjesa e parë e duelit kaloi pa gola dhe dukej se do të mund të befasonin mysafirët ndonjëherë, por për të shkuar gjithçka sipas planit të të gjelbërve vendas u përkujdesën më të dalluarit e tyre në pranverë, derisa ekipi fitoi bindshëm në fund, Feronikeli’74 3-0 Istogu [Muhamet Hyseni 57, Ibrahim Cervadiku 68, 88].
Pas 22 ndeshjesh, Feronikeli’74 ka 44 pikë dhe është lider i Ligës së Parë Grupi A. Ndërsa Istogu me gjasa po mbetet jashtë gare për barazh të Superligës me humbjen e sotme, derisa është i treti për momentin me 36 pikë nga 22 lojë.
