FIBA njeh BIBL, por jo ABA ligën

Në mbledhjen e rregullt të FIBA Europe të mbajtur dje në Gjermani, është konfirmuar se liga ballkanike (BIBL) njihet me të drejta të plota nga FIBA. 

Mirëpo, një njohje të till nuk e ka marrë liga e Adriatikut, që përmban ekipe më të njohura të basketbollit. 

“Bordi konfirmon njohjen e Balkan League, derisa nuk e njeh Adriatic League-në. Njohja e ligës bëhet nëse ajo ligë i përmbush kriteret e përcaktuara nga FIBA Europe dhe Statutin e saj bashkë me rregulloret e brendshme. Adriatic League, ka dështuar që të jep informata plotësuese të kërkuara nga FIBA Europe dhe FIBA, kështu që ajo nuk njihet më nga shtëpia e basketbollit europian, derisa vendimi do të hyjë në fuqi menjëherë pas përfundimit të këtij stinori, ashtu që të mos dëmtohen ekipet pjesëmarrëse që janë ende në lojë në këtë ligë,” është thënë në komunikatën e lëshuar nga FIBA Europe, menjëherë pas mbledhjes së lartëcekur. 

Drejtori Sportiv i BIBL, Shay Shtriks, ka falenderuar Bordin e FIBA Europe për bashkëpunimin, derisa edhe vetë liga ballkanike ka konfirmuar se FIBA mund të ketë qasje në të gjitha dokumentacionet që i kërkon edhe në vijim. 

Në Balkan League qe dy stinorë garojnë ekipet kosovare, Sigal Prishtina dhe Peja, derisa Adriatic League, e njohur shkurt si ABA League, nuk lejon pjesëmarrjen e ekipeve tona aty për shkak të ndikimit të madh serb.