Gjilani i rikthehet fitoreve, gara për titull shumë e fortë!

Pas barazimit ndaj Llapit në shtëpi xhiron e kaluar, Gjilani sot ka shënuar një fitore mjaft të rëndësishme në garën për titull, duke e mposhtur Feronikelin në Drenas.
Ndeshja e zhvilluar në “Rexhep Rexhepi” u mbyll me rezultat 0-2 për gjilanasit (Sebino Plaku 23’, Muhamed Useini 70’).

TABELA AKTUALE

Sebino Plaku i mysafirëve në minutën e 23’ të ndeshjes ishte ai që e hapi serinë e golave në këtë takim, e që nga ai moment gol më nuk pati deri në minutën e 70’ të ndeshjes. Ishte Muhamed Useini ai që në këtë minutë shënoi për 0-2 pas një gabimi të portierit Troshupa të vendasve, për ta mbyllur kështu ndeshjen me rezultatin përfundimtar 0-2.

Në fakt, portieri Troshupa “luajti rol” edhe në golin e parë të pranuar të skuadrës së tij, e për këtë ai u zëvendësua nga loja në minutën e 78’ të ndeshjes. Duke e bartur ndjenjën e fajit për dy golat e pësuar, largimi nga loja u përcoll mes lotëve nga vetë portieri në fjalë.

Me Feronikelin që nuk ka më gjasa reale për titull, Gjilani në anën tjetër mbetet ende në garën tejet të ngushtë për titull bashkë me Ballkanin, Dritën e Prishtinën.