DUKAGJINI - GJILANI
Gjilani s’gabon, i pamposhtur i prin tabelës
4 September, 2022 @16:54
13 pikë në 5 ndeshjet e para të sezonit për Gjilanin e Zekerija Ramadanit.
Skuadra gjilanase sot shënoi fitore minimale 0-1 (Theophilus Solomon 38’) ndaj Dukagjinit të Klinës, për të mbetur kështu në krye të tabelës, ndonëse me disa ndeshje më tepër të luajtura se disa skuadra të Superligës.
I asistuar nga Përparim Islami, që po kalon një sezon mjaft të mirë deri më tash, golin për gjilanasit në pjesën e parë e gjeti Theophilus Solomon, një tjetër lojtar në formë të mirë. Falë këtij goli të shënuar në minutën e 38’, Gjilani shkoi në pushim mes pjesëve me epërsi 0-1.
Pjesa e dytë e ndeshjes nuk dhuroi asnjë gol, me gjilanasit që e menaxhuan mirë epërsinë dhe e mbyllën ndeshjen me fitore minimale. Përveç golit të shënuar, Gjilani gjatë këtij takimi e goditi edhe dy herë shtyllën.
Goli i sotëm i Solomonit ishte i katërti për të në këtë kampionat dhe bashkë me sulmuesin Christian Mba të Trepçës ‘89, ai i prin listës së top golashënuesve për momentin.
Gjithashtu, vlen të përmendet që Dukagjinit sot i mungoi kapiteni Altin Merlaku, i cili pësoi një lëndim pak pa filluar ndeshja e sotme.
Pas 5 xhirove të para, Dukagjini mbetet i fundit në renditje me vetëm 1 pikë, kurse Gjilani i prin tabelës, duke qenë ende i pamposhtur deri më tani.
