Hidhet shorti, ekipet që kaluan në Ligë të Parë mësojnë grupet

Federata e Futbollit e Kosovës (FFK) është dashur të hedh short për të përcaktuar se cila nga skuadrat që erdhën prej Ligës së Dytë në Ligën e Parë do të futet në Grupin A e cila në Grupin B.

Kështu, kampionja e Ligës së Dytë, KF Shkëndija e Hajvalisë dhe nënkampionja KF Dinamo nga Ferizaji sot në shortin e tërhequr në zyret e Federatës, nën prani të kryetarit të Komisionit të Garave Abdyl Bellopoja, kanë mësuar se në cilin grup do të luajnë në stinorin 2023/24.

Shkëndija është shortuar të bëjë pjesë në Grupin B të Ligës së Parë, ndërsa Dinamo në Grupin A të Ligës së Parë.

Kujtojmë, të dy skuadrat që kaluan nga Liga e Dytë në Ligën e Parë janë të rajonit që zakonisht luan në Grupin B (Rajoni i Prishtinës dhe Rajoni i Ferizajit). Kështu, FFK është dashur të hedh short për të përcaktuar se cilat skuadra do të luajnë në cilin grup.

Me këtë, është kompletuar edhe dhjetëshja e Grupeve A dhe B të Ligës së Parë për edicionin 2023/24 të garave, ku në Grupin A do të bëjnë pjesë: Trepça’89, Drenica, Trepça, Phoenix, Istogu, Rilindja 1974, Rahoveci, Vëllaznimi, Suhareka dhe tashmë edhe Dinamo.

Ndërkaq në Grupin B të Ligës së Parë garojnë: Ferizaji, Ulpiana, Flamurtari, Ramiz Sadiku, 2 Korriku, Kika, Vllaznia, Vjosa, Vushtrria dhe me sot edhe Shkëndija.

Si Shkëndija, ashtu edhe Dinamo janë debutuese në Ligë të Parë, pasi që  janë ekipe të krijuara së voni dhe kjo është arritja më e madhe e tyre në histori.

“Sot në prani të kryetarit të Komisionit të Garave, Abdyl Bellopoja dhe përfaqësuesve të KF Shkëndija dhe KF Dinamo është bërë tërheqja e shortit sa i përket ndarjes së këtyre dy klubeve në grupet përkatëse të Ligës së Parë për edicionin 2023/24. Pas shortit të tërhequr KF Dinamo do të garojë në Grupin A, derisa KF Shkëndija në Grupin B të Ligës së Parë. Kryetari i Komisionit të Garave u dëshiroi suksese të dyja skuadrave të promovuara në këtë rang të garave, duke uruar që ato do të kenë rrugëtim të suksesshëm edhe në këtë nivel të garave.” — shkroi FFK në njoftim.◼️