VLORË
Italiani Ramella te Flamurtari
6 November, 2014 @10:54
Skuadra fituese e Kupës së Shqipërisë, Flamurtari, pas largimit të trajnerit të njohur shqiptar, Ernest Gjoka, ka emëruar mbrëmë zyrtarisht trajner të ri të skuadrës, italianin Ernestino Ramella.
Ramella 59 vjeç ka përvojë të punës së trajner në Meksikë e Zvicër, derisa në Itali ka punuar vetëm në kategoritë e ulëta.
Ai ka qenë ish lojtar i Vareses dhe si asistent ka marrë Paolo Doton, gjithashtu ish lojtar i Vareses.
“Në Itali kur përmendet Shqipëria, reagimet nuk janë aq pozitive, por këtu kushtet janë shumë të mira dhe bashkëkohore,” ka thënë ndër të tjera Ramella në prezentimin e tij si trajner i ri i vlonjatëve.
Flamurtari nuk ka fituar që nga data 20 shtator në Kategorinë Superiore të Shqipërisë. Gjashtë xhirot e fundit në kampionat kanë kaluar pa fitore për ekipin nga Vlora që shkarkoi Gjokën pas këtyre rezultateve.
Flamurtari aktualisht është në pozitën e gjashtë të Kategorisë Superiore shqiptare me 14 pikë nga 11 ndeshje.
Në ndeshjen e parë të tij si trajner i kuqezinjëve, italiani 59 vjeç, Ramella (ish trajner i Comos, Chiassos) do të ndeshet me Apoloninë e Fierit, si mysafir.
