Januzaj mes Belgjikës dhe Kosovës

Futbollisti i Manchester Unitedit, Adnan Januzaj, do ta zgjedh njërën nga përfaqësueset e Kosovës apo të Belgjikës. Kështu mendon ish kapiteni i kombëtares shqiptare, Besnik Hasi, duke hedhur poshtë mundësinë që Januzaj ta përfaqësojë Shqipërinë apo edhe Anglinë në të ardhmen.

“Kosovarët janë një popull krenar, kjo edhe për faktin se nuk kanë pasur lirinë që kanë pasur vendet e tjera të Europës. Janë njerëz të lidhur ngushtë me origjinën dhe me tokën e tyre, aq sa në Kosovë dy gjëra janë të shenjta: flamuri dhe familja. Sa i përket Januzajt, mendoj se ai do zgjedhë mes Belgjikës ku ka lindur dhe Kosovës, ku janë rrënjët e familjes së tij,” ka thënë Hasi për mediat belge, përkatësisht për faqen elfvoetbal.nl.

Hasi, tashmë zëvendëstrajner i skuadrës belge, Anderlecht, ka qenë njëri prej futbollistëve të parë kosovarë që ka mbrojtur ngjyrat kuqezi të kombëtares së Shqipërisë.