KB Bashkimit i lirohet pengesa nga FIBA

Përmes një njoftimi sot, KB Bashkimi ka bërë të ditur se i është larguar pengesa nga FIBA për regjistrim të lojtarëve dhe pengesa për pjesëmarrje në Superligë.

Skuadra e Bashkimit ka arritur marrëveshje me reprezentuesit e ish-basketbollistëve të saj, Ljubo Samadan dhe Alex Gruev, dhe me pagesën e këstit të parë në drejtim të palëve, FIBA ka larguar pengesat e ekipit prizrenas për stinorin në vijim.

“Në adresë të palëve të dëmtuara fillimisht janë paguar 17,000.00 euro, me kusht që brenda dhjetë muajve në vijim klubi do të paguaj edhe shifrën e mbetur prej 43,000.00 euro që në total bëjnë 60,000.00 euro,” ka bërë të ditur njoftimi i klubit, i botuar sot.

Samadan ka qenë pjesë e Bashkimit nga shtatori i vitit 2017. Atëherë, kroati ka pasur 34 vjet kur ka arritur në “Sezai Surroi”. Në po të njejtin stinor, kishte ardhur edhe bullgari Gruev.

KB Bashkimi në këtë njoftim ka falenderuar edhe kreun e Komunës së Prizrenit, Mytaher Haskuka, si dhe Drejtorin për Sport, Ehat Oreshka.

Të premten, më 13 shtator hidhet shorti për edicionin e ri të Superligës. KB Bashkimi në stinorin e kaluar arriti në gjysmëfinale të PlayOffit, ndërsa kishte qenë pjesë edhe e Final 8 të Kupës si dhe e BIBL-it.

Ekipi ka emëruar trajner të skuadrës Illmen Bajrën, që është selektor i grupmoshave të femrave të Kosovës por edhe ka punuar si ndihmës-trajner i Damir Mulaomerovicit te Prishtina në stinorin e kaluar.