Kukësi bashkëkryesues me fitore ndaj Laçit

Kukësi ka arritur të shënojë fitore minimale ndaj Laçit sot në stadiumin Zeqir Ymeri të qytetit verilindor të Shqipërisë, për të bashkëkryesuar me Tiranën në krye. 

Ekipi i udhëhequr nga trajneri Artim Shaqiri, ka shënuar gol përmes sulmuesit kosovar Kushtrim Lushtaku, i cili ka arritur të shënojë gol në minutën e 75-të edhe me ndihmën e mbrojtësit laçjan, Arian Sheta. 

Kukësi ka shënuar fitore në katër ndeshjet e fundit të Kategorisë Superiore dhe ka kapur një formë të shkëlqyer, derisa sulmuesi kroat i tyre, Pero Pejic, mbetet në krye të listës së golashënuesve të Superiores edhe pas kësaj xhiroje me 7 gola të shënuara nga 12 ndeshje. 

Laçi ka pësuar humbjen e tretë me radhë, pas atyre ndaj Skenderbeut dhe Partizanit dhe gjindet në pozitën e pestë të tabelës me 16 pikë. 

Tirana e Kukësi me nga 25 pikë kryesojnë kampionatin shqiptar, derisa ndiqen nga afër prej Skenderbeut dhe Partizanit me nga 24 pikë.