PRIZREN
Liria, përsëri barazon
25 October, 2015 @15:25
Liria ende nuk ka shënuar fitore nën drejtimin e trajnerit të ri Erdogan Celina. Barazimi i radhës për prizrenasit ka qenë i pashmangshëm, pasi që portieri i Hajvalisë, Petrit Tahiri është treguar në formë sot për të mbrojtur rastet ideale të bardhezinjëve.
Në fakt, në pjesën e parë Hajvalia është treguar në disa raste më e rrezikshme, por Liridon Leci ka hasur në Armend Ruxhin e gatshëm në zonë.
Florim Bërbatovci, Valon Bytyçi dhe Alban Dylazeka kanë pasur rastet më të mira për Lirinë - derisa Tahiri i Hajvalisë ka qenë në vend.
Me fillimin e pjesës së dytë ekipi i Ismet Munishit ka provuar përmes Berat Hysenit, pastaj Semir Zenelit e Fuad Karabegut, por mbrojtja e vendasve në Përparim Thaçi është treguar e vëmendshme.
Tani, Liria është ekipi me më së shumti barazime në Superligë - gjashtë, derisa Hajvalia ka regjistruar barazimin e parë të stinorit.
