Liverpool pranë sulmuesit belg

Christian Benteke, 24 vjeç, është pranë kalimit në Liverpool. Njoftimin e ka dhënë Echoja sot, duke bërë të ditur se ekipi nga Anfield Road është pajtuar që t’ia paguajë shumën prej 32.5 milionë funtave Aston Villës, sa është klauzola për blerjen e tij në kontratë me ekipin aktual. 

Pas shitjes së Raheem Sterlingut për 49 milionë funta drejt Manchester Cityt, Liverpool tashmë një pjesë të madhe të këtyre parave do t’i investojë te belgu Benteke, duke e aktivizuar klauzolën. 

Nëse realizohet transferimi i Bentekes, siç po shkruajnë mediat britanike, atëherë ai do të bëhet lojtari i dytë më i shtrenjtë që e ka blerë ndonjëherë Liverpool, pas Andy Carrollit, të cilin e kishin marrë për 35 milionë funta nga Newcastle United në vitin 2011.