Më pak se 40 ditë deri në fillimin e edicionit 2023/24 të Superligës

Në mbledhjen e KE-së së FFK-së sot, pos përcaktimit për selektorin e Kosovës lidhur me kualifikimet drejt EURO 2024, është vendosur edhe për fillimin e stinorit të ri në Superligë, Ligë të Parë dhe atë U-21.

Gjithashtu, është përcaktuar data edhe kur do të mbahet shorti për edicionin e ri të garave, derisa janë miratuar edhe Rregulloret e garave.

“Komiteti Ekzekutiv i FFK-së sot mbajti mbledhjen e vet të radhës nën drejtimin e presidentit Agim Ademi. Në këtë mbledhje KE bëri një rezyme për përfundimit të garave në të gjitha rangjet dhe kategoritë me konstatimin se garat ishin zhvilluar sipas dinamikës së paraparë e që reflektuan me ngritje të cilësisë, shtim në organizim dhe rivalitet sportivë. KE uroi ekipet që arritën të kalojnë një rang më të lartë të garave, ndërsa atyre që u larguan nga ligat u dëshiroi suksese në të ardhmen. KE caktoi datën 31 korrik kur do të hedhet shorti i garave për edicionin 2023/2024, ndërsa edicioni i ri 2023/2024 fillon me garat e Superligës më 12 gusht, ndërkaq ato të Ligës së Parë më 19 gusht. Njëkohësisht garat e Ligës U21 nisin njëjtë me garat e Superligës më 12 gusht. KE miratoi edhe Rregulloret e garave në konkurrencën e meshkujve dhe të femrave.” - ka bërë të ditur FFK-ja sot.◼️