Milik para testeve mjekësore te ekipi i ri

Njëri ndër sulmuesit e dalluar polak, Arkadiusz Milik, që është pjesë e ekipit italian Napoli, po udhëton sot drejt Marseilles në Francë, ashtu që të kompletojë testet mjekësore para nënshkrimit me ekipin e tij të ri, Olympique Marseille.

Sky Sport Italia ka bërë të ditur se marrëveshja që dukej e pamunudur në fillim për shkak të kërkesave të mëdha të napolitanëve, është shumë afër zgjidhjes dhe Milik pritet të bëhet anëtar i ri i marsejezëve duke u huazuar deri në fund të këtij stinori dhe pastaj të aktivizohet opcioni i blerjes.

Sipas raporteve, Marseille do të paguajë 9 milionë euro për të marrë lojtarin, pastaj do të shtojë edhe 3 milionë euro tjera me bonuse si dhe do t’i jep Napolit 20% të fitimit nga shitja potenciale e lojtarit.

Milik 26-vjeçar nuk po gjen vend në ekipin e parë të Napolit, që po drejtohet nga Gennaro Gattuso, ndërsa po kërkon minuta në këmbë, ashtu që të sigurojë ftesën për Poloninë për EURO 2020 që zhvillohet këtë verë.