Mund të ishte edhe provokim

Ndeshja tashmë e tejpërfolur Serbi-Shqipëri, sa për shkak të skandalit që ndodhi në stadium, sa për shkak të vendimit habitës të UEFA-së - nuk harrohet lehtë.

Në një prononcim për Sky Sport, trajneri i kuqezinjëve, Gianni De Biasi ka thënë se gjithçka ka ardhur si pasojë e keqorganizimit të vendasve. 

“Qindra herë e kam thënë se gjithçka erdhi nga keqorganizimi. Por ajo që më bëri përshtypje ishte se forcat e rendit nuk lëviznin as gishtin e vogël. Ishin gjëra që nuk i kisha parë në karrierën time. Klima e urrejtjes ndaj shqiptarëve ekzistonte, rrugës për stadium, në stadium por edhe pas largimit tonë,” është cituar nga Panorama Sport të ketë thënë De Biasi për Sky Sport. 

Ai foli edhe për fluturaken që u pa në stadium me flamur, të komanduar nga jashtë. 

“Dikush që bën diçka të tillë duhet të jetë paksa i çmendur. Mirëpo, ajo gjë mund të ketë qenë edhe provokim,” ka shtuar italiani 56 vjeçar, që me sukses po drejton kuqezinjtë drejt EURO 2016. 

UEFA-ja për incidentet e asaj dite ia dha fitoren Serbisë në tavolinë 3-0, teksa ia hoqi 3 pikë në tabelë. Për më tepër, të dy Federatat u dënuan me nga 100 mijë euro, derisa serbët janë dënuar gjithashtu me dy lojë si vendas pa prani të publikut.