Në Ligën e katërt të Kroacisë!

Arijan Ademi, mesfushori i Dinamo Zagrebit, gjatë muajit tetor të vitit që e lëmë pas ishte suspenduar nga UEFA-ja, pasi kishte rezultuar pozitivisht në testin e dopingut.

Ademi, në bazë të vendimit të UEFA-së, në katër vitet e ardhshme nuk do të mund të luajë për një skuadër profesioniste, me ç‘rast edhe kontrata e tij me Dinamon ishte shkëputur.

Megjithatë, reprezentuesi i përfaqësueses së Maqedonisë po synon të gjejë një rrugëdalje nga kjo krizë që e ka kaplluar.

Ademi tashmë është treguar i gatshëm të luajë edhe për skuadrën amatore, NK Kustošija, që garon në Ligën e katërt të Kroacisë, e që llogaritet si ligë amatore.

Ai këtë e ka konfrimuar edhe nëpërmjet faqes zyrtare të ish klubit të tij, Dinamo Zagrebit.

”Është vështirë të shpjegoj se çfarë më ka ndodhur prej se kam rezultuar pozitivisht në testin e dopingut në tetor. Kam menduar gjatë për gjithçka, në lidhje me mundësit dhe gjithë situatën. Natyrisht, kam menduar për përfundimin e karrierës, por futbolli është jeta ime dhe unë nuk mund të përfundoja karrierën në këtë mënyrë,” tha fillimisht 24 vjeçari.

Ndërsa në lidhje me mundësinë për të luajtur te skuadra amatore NK Kustošija, Ademi tha: “Kam dëgjuar për këtë mundësi, por ende nuk i di të gjitha detajet. Besoj se Dinamo do ta bëjë zgjedhjen më të mirë për mua dhe unë do të bëjë çmos për të luajtur futboll përsëri. Unë do të jap më të mirën nga vetja për cilën do skuadër që do të luaj. Liga e Kampionëve, Superliga e Kroacisë, apo Liga e katërt e Kroacisë. Do të jap më të mirën për cilën do. Mundësia më reale për tani është që të luaj në Ligën e katërt dhe unë do të përpiqem që të jap maksimumin aty.”

Periudha e fundit para suspendimit të Ademit, mund të llogaritej si kulmi i karrierës së futbollistit në fjalë, pasi ai ishte shndërruar në një prej shtyllave kyçe te ekipi kroat, e mandje ishte bërë edhe ndihmës kapiteni i skuadrës.