Në Portugali, jo për shëtitje!

Përzgjedhësi italian i kombëtares shqiptare, Gianni De Biasi, sot ka mbajtur një konferencë për shtyp para ndeshjes Portugalia - Shqipëria.

Tekniku italian ka lëvduar skuadrën kundërshtare, duke e cilësuar ate si një skuadër shumë e fortë, aq sa mund ta mbulojë edhe mungesën e yllit të tyre, Cristiano Ronaldos, i cili nuk do të luajë në këtë ndeshje.

“Sigurisht, që vlerat e skuadrës portugeze janë të njohura, jo vetëm për ne por për të gjithë. Një skuadër që prodhon gjithmonë futboll. Pas zhgënjimit në Botërorin e fundit, patjetër  do të jenë më të motivuar për ti nisur sa më mirë Eliminatoret.”

“Cristiano Ronaldo është një lojtar fantastik, vlerat e të cilit janë të njohura nga të gjithë. Mungesa e tij, krijon vështirësi për kundërshtarët tanë, por Portugalia mendoj se është një skuadër e zonja për të kompensuar vlera të tilla, sado të rëndësishme të jenë.”

De Biasi foli edhe për mënyrën e lojës së skuadrës së tij, duke thënë nuk kanë udhëtuar për shëtitje në Portugali, derisa nuk e ka përjashtuar as mundësinë e lojës së mbyllur në mbrojtje sipas mundësive për të arritur objektivat.

“Ne kemi ardhur këtu për të zhvilluar lojën tonë dhe për të provuar shanset tona. E respektojmë kundërshtarin dhe vlerësojmë nivelin e tij. Por kjo, s’do të thotë se s’ kemi synimet tona. Sigurisht, nuk kemi ardhur për shëtitje. Do të mundohemi të mos gabojmë në veprimet mbrojtëse dhe do të tentojmë të godasim kundërshtarin.”

“Në momente të caktura të ndeshjes, kur presioni  i kundërshtarit vjen duke u rritur, nuk përjashtohet mundësia për tu mbyllur dhe krijuar sa më pak hapësira për kundërshtarin. Por ky, nuk do të jetë synimi ynë. Do të shfrytëzojmë çdo mundësi për të goditur dhe për të arritur objektivat tona.”

Ndeshja kundër Portugalisë është e para në kuadër të eliminatoreve për Kampionatin Europian Franca 2016. Kjo ndeshje do të luhet nesër (e diel) dhe do të fillojë nga ora 20:45.