Peja me mobilizim të shpejtë

Pas zyrtarizimit të lajmit të mirë dhe aprovimit të kërkesës për kthyerje në Superligë, KB Peja ka bërë të ditur se do të nis mobilizimin e shpejt të skuadrës për të qenë e gatshme për gara, që ka qenë njëri ndër kushtet për t’u bërë pjesë e Superligës.

KB Peja nuk kishte fituar të drejtën për regjistrim në stinorin e kaluar, për shkak të moskryerjes së obligimeve ndaj lojtarëve të huaj.

Në ndërkohë, në njoftimin e lëshuar KB Peja ka falenderuar kreun e FBK-së, Arben Fetahu, për konsideratën e treguar lidhur me rikthimin e ekipit në Superligë.

“Miratimi i kërkesës së KB Peja është i kushtëzuar me heqjen e të gjitha ndalesave të regjistrimit të lojtarëve të rinj dhe paraqitjen e ekipit konkurrues për nivel të Superligës së Kosovës në basketboll deri në afatin e përcaktuar të afatit kalimtar,” është kushti i FBK-së.

Me këtë, Superliga pritet t’i ketë nëntë ekipe pjesëmarrëse këtë stinor, duke përfshirë edhe KB Pejën aty.