Përvoja e Evansit, sjell barazimin në fund!

Një ndeshje që fliste për fitoren e parë të Qipros, pas dy golave të para të shënuara në grup, përfundoi duke ndarë pikët në fund!

Rivalët që u mposhtën nga Greqia e Kosova në Grupin 2 të Ligës C të Kombeve janë ndarë përsëri me barazim, njëjtë sikurse u ndanë në Larnaca javën e kaluar, por kësaj radhe me gola dhe dramë në fund!

ORARI I NDESHJEVE dhe TABELA AKTUALE

Andronikos Kakoulis ka qenë golashënues i dyfishtë për Qipron dhe i çoi ata në avantazh 0-2 në Windsor Park të Belfastit për të shtangur vendasit.

Mirëpo, në 20-minutat e fundit të ndeshjes vendasit të udhëhequr nga përkrahja frenetike prej tribunave, arritën që të rikthehen në lojë dhe të shpëtojnë nga humbja, kur në kohën shtesë të ndeshjes shënoi ish-futbollisti i Manchester Unitedit, Johny Evans për të barazuar në 2-2 [McNair 71, Evans 90+3 - Kakoullis 32, 51].

Pikët e ndara në këtë ndeshje bëjnë që Kosova të jetë thuajse plotësisht e sigurt minimalisht në pozitën e dytë në këtë grup, ndërsa për të arritur triumfin në grup dhe ngritjen në Ligë të Kombeve, do të duhet që sonte përkundër mungesave të theksuara t’i tregojë dhëmbët grekëve.