Prishtina përsëri mposhtë Dritën, “nxehet” gara për titull

Në Superkupë, pastaj në Kupë e sot në ligë!

E treta fitore rresht gjatë vitit 2021 për Prishtinën ndaj Dritës.

Sot skuadra kryeqyetetase e mposhti kampionin në fuqi të Kosovës me rezultat 2-0 (Leotrim Bekteshi 17’, Tun Bardhoku 88’), për të bërë kështu një hap të fuqishëm në garën për titullin kampion.

TABELA AKTUALE

Siç ka ndodhur shpesh viteve të fundit, edhe sot mes skuadrave u zhvillua një ndeshje pragmatike, e golat i gjeti vetëm Prishtina, për të shënuar kështu fitore të rëndësishme.

Autori i golit të epërsisë për Prishtinën ishte Leotrim Bekteshi në minutën e 17’ të ndeshjes, ndërkohë që menaxhimi i epërsisë për kryeqytetasit u lehtësua kur Henry Onoka i Dritës u përjashtua nga loja në minutën e 61’ të takimit.

Përkundër inferioritetit numerik, gjilanasit ende e kërkonin barazimin, madje edhe e gjetën golin përmes Kastriot Rexhës (71’), mirëpo për fatin e keq të tyre, Rexha ndodhej në pozicion jashtë loje dhe goli u anulua.

Pak para fundit, prishtinasit e gjetën edhe golin që e vulosi fitoren. Ishte mbrojtësi Tun Bardhoku ai që shënoi për rezultatin përfundimtar 2-0 në minutën e 88’ të ndeshjes.

Kjo fitore bën që Prishtina ta vazhdojë formën e mirë në pranverë dhe ta vazhdojë fuqishëm garën për titull, ndërkohë që Drita do të kërkojë përmirësim të performancave duke filluar nga xhiro e ardhshme.