Refuzohet ankesa e Lirisë!

Federata e Futbollit të Kosovës (FFK) ka bërë të ditur në një njoftim të saj se Komisioni për Ankesa (KA) i shkallës së dytë ka referuar ankesën e Lirisë që ka atakuar Vendimin e Komisionit Disiplinor lidhur me dënimin me dy ndeshje moslojë për mbrojtësin e krahut Siyabonga Dube.

Por, KA e ka refuzuar ankesën e Lirisë si të pabazuar dhe Vendimi i KD-së do të mbetet në fuqi, ka bërë të ditur njoftimi i KA. Mëposhtë, procedura e shkruar në Vendimin e KA-së.

“Komisioni për Ankesa – shkalla e dytë, në përbërje Haki Xhemjali kryetar, Sitki Baftiu dhe Remzi Azemi anëtarë, në mbledhjen e mbajtur me datë 04.10.2023 shqyrtoi ankesën e KF “Liria” me nr Reference 1432/1 datë 03.09.2023 që ka atakuar vendimin e Komisionit Disiplinor – shkalla e parë të datës 29.09.2023, i cili ka dënuar futbollistin e KF “Liria” , Siyabongu Dube me 2 (dy) ndeshje mos lojë sipas radhës organizuara nga FFK , pasi qe në ndeshjen e xhiros së shtatë të Albi Mall Superliges Gjilani-Liria , është ndëshkuar me karton të kuq direkt pas ndërhyrjes si lojtar i fundit duke mohuar mundësinë kundërshtarit për gol. Në ankesën e parashtruar KF “ Liria” , lidhur më këtë rast ka kërkuar nga Komisioni për Ankesa – shkalla e dytë që dënimi prej dy ndeshje ti hiqet dhe se lojtari Siyabongu Dube ta vuaj dënimin vetëm për një ndeshje . Në arsyetim të kësaj thuhet se lojtari kishte për qëllim ta largoj topin e jo ndërhyrje në lojtarin kundërshtar . Pas shqyrtimit të të gjithë dokumentacionit dhe provave tjera shtesë, Komisioni për Ankesa – shkalla e dytë mori këtë:
V E N D I M Komisioni për Ankesa – shkalla e dytë në mbledhjen e mbajtur më datë 04.10.2023 pas shqyrtimit të të gjitha shkresave, argumenteve dhe provave shtesë të ofruara, vendimi i Komisionit Disiplinor – shkalla e parë të datës 29.09.2023 vërtetohet, ndërsa ankesa e KF “ Liria” refuzohet si e pabazuar. Komisioni për Ankesa – shkalla e dytë, mori këtë vendim bazuar në nenin 119 pika A të Rregullores Disiplinore.”

Me këtë, Dube pos që ka qenë i suspenduar në përballje ndaj Malishevës të cilën Liria e humbi, nuk do të mund t’i ndihmojë shokëve të skuadrës as në përballjen e kësaj fundjave, ndaj Llapit në “Zahir Pajaziti”.