Rexhepi: Fitoren ua dedikoj “Arpaxhik’ve”

Trajneri i Lirisë, Xhengis Rexhepi, ka qenë tejet i kënaqur me rezultatin e arritur sot, ku ekipi i tij mposhti rivalin direkt për Superligë me rezultat të thellë 3-0, duke i shkaktuar atyre humbjen më të thellë të këtij stinori.

Trajneri tetovar i prizrenasve ka bërë të ditur se ekipi i tij dominoi dhe ka mundur të shënojë ende në këtë ndeshje, kurse nga duelet direkte me Feronikelin’74 prej 9-pikëve të mundshme, Liria i ka marrë 7!

“Takim shumë i rëndësishëm për ecjen e mëtutjeshme të klubit dhe skuadrës. Përballë kemi pasur skuadër shumë të fortë. Duke parë rëndësinë e ndeshjes kemi bërë përgatitje të shumta. Mendoj që kemi dominuar takimin, kurse kundërshtarit nuk i kemi dhënë asnjë rast shënimi. Jam tepër i kënaqur nga loja e futbollistëve sot. E dinim mirë si luan kundërshtari, kurse prej tyre këtë stinor nga 9 pikë sa kanë qenë në lojë kemi marrë 7, duke ditur që janë rivali kryesor për Superligë. Fitoren ia dedikoj tifozëve Arpaxhik’t si dhe kryesisë që na qëndron gati. Kurse meritat kryesore i shkojnë futbollistëve, pasi që ata janë që e bëjnë punën kryesore,” ka thënë Rexhepi ndër të tjera pas ndeshjes.

Liria tash ka një pikë më pak se Feronikeli’74 në krye të renditjes, ndërsa deri në fund të stinorit të dyja skuadrat kanë edhe nga gjashtë ndeshje.