Shkaku i Pandevit, Angelovski shtyen publikimin e listës ndaj Kosovës

Selektori i reprezentacionit të Maqedonisë Veriore, Igor Angelovski, ka pasur në plan që të publikojë sot listën e lojtarëve të ftuar për përballjen e madhe të 8 tetorit ndaj Kosovës.

Mirëpo, ai e ka shtyer këtë, për shkak të sulmuesit veteran dhe më të suksesshëm të vendit Goran Pandev, që luan për Genoën.

Genoa pas ndeshjes ndaj Napolit në Serie A raportoi për 11 lojtarë të infektuar me coronavirus.

Sot ekipi italian bëri të ditur se lojtarët e infektuar janë: Francesco Cassata, Lukas Lerager, Federico Marchetti, Filippo Melegoni, Luca Pellegrini, Mattia Perin, Marko Pjaca, Ivan Radovanovic, Lasse Schöne, Davide Zappacosta dhe sot Valon Behrami janë pozitiv.

Kështu, pasi që Pandev ka dalë negativ, pritet që të jetë në listën e të ftuarve të Maqedonisë Veriore për përballje ndaj Kosovës më 8 tetor, që pritet të publikohet të shtunën.