KOMUNIKATA E SHOQATËS
Shoqata: Futbollistët duan vazhdim, pasi s’kanë rroga
11 May, 2020 @19:20
Shoqata për Mbrojtjen e të Drejtave të Futbollistëve të Kosovës (ShMDFK) para pak çastesh ka dalë me një Komunikatë për shtyp ku ka bërë të ditur se futbollistët e skuadrave kosovare janë të gatshme për t’iu kthyer fushave të gjelbëra.
Dhe kjo, siç vërehet nga Komunikata është gjendja e rëndë ekononimike e disave që thuhet se do të rëndohet edhe më shumë pa luajtur futboll.
Në vijim, lexoni letrën e plotë të ShMDFK-së:
Në vijim të takimit të fundit të mbajtur me anëtarët e bordit dhe kapitenët e Superligës së futbollit, Shoqata për Mbrojtjen e të Drejtave të Futbollistëve të Kosovës njofton opinionin e gjerë se kemi pajtueshmëri të plotë për vazhdimin e pjesës së mbetur të kampionatit.
Pavarësisht pozitës tabelare të skuadrave të tyre dhe nevojës për ndryshim të kalendarit sezonal, futbollistët janë të gatshëm që ndeshjet e mbetura të zhvillohen pasi që gjendja e tyre ekonomike do të rëndohej edhe më shumë nëse kampionati do të anulohej. Tanimë e dijmë që ka klube të cilat nuk i kanë paguar futbollistët e tyre me muaj dhe nëse nuk do të paguheshin as për muajt në vazhdim, atëherë do të rrezikohej dukshëm mirëqenia e tyre dhe e familjeve të tyre.
Normalisht se ShMDFK dhe kapitenët bëjnë thirrje që një vendim i tillë eventual të vie si pasojë e shterrimit të konsultimeve në mes institucioneve përgjegjëse qeveritare (MSh, MKRS) dhe atyre sportive (ShMDFK, KOK, FFK), dhe pashmangshmërisht të konsultohet IKSHPK - për rekomandime shtesë. Futbollistët janë të vetëdijshëm për ndikimin serioz të pandemisë në aspekt shëndetësor; por, pa harruar kurrsesi edhe atë ekonomik, gjë të cilën e kanë ndjerë direkt në mirëqenien e tyre.
Njëlloj si në komunikatën tonë të bërë publike më 6 prill 2020, ritheksojmë nevojën e rëndësisë së lartë për të thelluar bashkëpunim me institucionet e lartëpërmendura me qëllim që zëri i futbollistëve të respektohet. Shoqata përsërit poashtu nevojën e krijmit të një komisioni (grupi punues) të mandatuar për analizimin e situatës aktuale në futboll, dhe ofrimit të zgjidhjes më optimale për të siguar vazhdimin e kampionati.
Poashtu, vlerësojmë se referencë e mirë për aspektin e mbrojtjes së shëndetit të secilit prej nesh janë praktikat më të mira nga Evropa dhe më gjerë.