MIQËSORE
REUTERS
Shqipëria-Kolumbia, më 5 mars!
23 January, 2014 @10:01
Si duket kundërshtari i radhës për kombëtaren shqiptare në ndeshje miqësore, pritet të jetë serioz. Sipas njoftimeve nga mediat tiranase, Shqipëria vetëm sa nuk e ka zyrtarizuar miqësoren me Kolumbinë në datën e lirë nga FIFA, 5 mars.
Burime të Federatës Shqiptare të Futbollit kanë bërë të ditur se kompania që po mirret me organizimin e kësaj miqësoreje, thuajse ka mbyllur kontratën pasi që ka marrë nënshkrimet nga të dy federatat, shkruan Panorama Sport në numrin e sotëm të saj.
Miqësorja Shqipëri - Kolumbi pritet të zhvillohet në Zvicër, në Gjenevë, pasi që futbollistët kryesorë të të dyja palëve luajnë nëpër Europë. E duke ditur se kolumbianët dy miqësoret e kaluara i kanë luajtur pikërisht në Europë, ndaj Belgjikës e Holandës, atëherë Zvicra mund të jetë shumë lehtë destinacioni i radhës i jugamerikanëve për miqësoren e radhës.
Shqipëria është e 56-ta në renditen e përgjithshme të FIFA-së, derisa Kolumbia e katërta dhe në formë të jashtëzakonshme, pasi që kanë siguruar edhe Kampionatin Botëror, Brazili 2014.
Mirëpo, reprezentacioni kolumbian është në panik derisa Monaco lëshon njoftimin zyrtar për lëndimin e mbrëmshëm të futbollistit më të mirë të tyre, Radamel Falcao, që dyshohet se do të merr pjesë në Brazili 2014.
