Skënderbeu, gati për Ligë të Kampionëve

Kampioni i Shqipërisë, Skënderbeu, që është duke kaluar fazën përgatitore në Austri, për stinorin e ri si në Europë ashtu edhe në Superiore, duket të jetë gati për përballjet e Ligës së Kampionëve. 

Së paku kështu ka thënë trajneri i kampionëve, Mirel Josa, që vetëm pas penalltive stinorin e kaluar nuk e arriti kualifikimin në Europa League. 

“Të gjitha ekipet kur u hodh shorti i Ligës së Kampionëve, e donin përballë Skënderbeun. Kjo i ra BATE Borisovit, por diçka do të them, askush nuk do ta ketë punën e lehtë me ne,” ka thënë Josa në një intervistë me Panorama Sport. 

Ai ka thënë se ekipi i tij është përgatitur mjaft mirë taktikisht dhe fizikisht për përballjet e Ligës së Kampionëve dhe përkundër kundërshtarit të vështirë që në xhiron e parë kualifikuese - ata do të kërkojnë kualifikimin për raundin e radhës. 

“Do ta shohim në ditën e ndeshjes se si do t’ia dalim. Ajo që mund të them është se do të jemi 100% të përqëndruar në çdo sekond të lojës,” shtoi Josa. 

Skënderbeu ndeshjen e parë kualifikuese e luan në Bellorusi më 15 korrik, derisa ajo e kthimit luhet një javë më vonë në Shqipëri. Ekipi korçar ka bërë përforcime të konsiderueshmë para stinorit të ri, duke sjellë mbrojtësin me përvojë, Kristi Vangjeli nga Aris, pastaj Elis Bakajn në sulm, derisa Bledi Shkëmbi llogaritet të jetë zemra e ekipit përkundër moshës së tij. 

Te Skënderbeu luajnë edhe 4 futbollistë që u transferuan nga Superliga e Kosovës më parë: Bajram Jashanica, Samir Sahiti, Bernard Berisha dhe Leonit Abazi.