Messi u frikësua nga Zvicra

Ylli argjentinas, Lionel Messi, ka pranuar se është frikësuar nga eliminimi nga Kupa e Botës në ndeshjen e së tetës së finales ndaj Zvicrës, të cilën Argjentina e fitoi në minutën e parafundit të kohës shtesë të takimit. 

Ka qenë pikërisht Messi që asistoi për Angel Di Marian, i cili shënoi golin e fitores dhe të ‘çlirimit’ për Gauchosët. 

“Kam qenë i nevrikosur kah fundi i ndeshjes pasi që ne nuk po shënonim dot dhe çdo gabim do të na kushtonte shumë,” ka thënë 27 vjeçari që luan për Barcelonën. 

“Minutat kalonin derisa ne nuk donim që të shkojmë te penalltitë. Vuanim për një gol, por me golin e Di Marias tani mund të festojmë,” ka vazhduar më tej 4 herë lojtari më i mirë i Botës. 

Argjentina ka siguruar një vend në TOP 8 ekipet e Kupës së Botës “Brazili 2014” duke e mposhtur Zvicrën, derisa në çerekfinale do të ndeshet me Belgjikën.