KORÇA

Pamje nga ndeshja e parë Neftçi-Skënderbeu/Panorama

Skënderbeu me premi për kualifikim

23 July, 2013 @10:06

Kampioni i Shqipërisë, Skënderbeu, sonte zhvillon në Korçë ndeshjen e kthimit ndaj kampionit të Azerbejxhanit, Neftçi.

Për t’u motivuar më shumë, pas rezultatit 0-0 nga ndeshja e parë, ku Neftçi ishte favorit absolut, kreu i Skënderbeut, Ardian Takaj, u ka premtuar futbollistëve premi prej 100 mijë eurosh në rast kualifikimi në raundin e tretë të Ligës së Kampionëve.

Në anën tjetër, trajneri i skuadrës azerbejxhanase, Boyukagha Haciyev, duke e cilësuar si të dobët kampionin e Shqipërisë, ka paralajmëruar dorëheqje të parevokueshme në rast të moskualifikimit të ekipit të tij. Neftçi bazohet te dyshja e huaj sulmuese, braziliani Flavinho dhe futbollisti i Siera Leones, Julius Wobay - të cilët u ndalën në ndeshjen e parë në Baku nga mbrojtja shqiptare dhe pritjet fenomenale të Orges Shehit.

Trajneri i Skënderbeut, Mirel Josa, ka gati skemën e lojës së skuadrës së tij dhe ka bërë të ditur se pret ofanzivë totale nga kundërshtari, për të cilën arsye ka vendosur të luaj me formacion 4-1-4-1. Ndërsa 11-shja e parë e Skënderbeut pritet të duket kështu: Shehi; Sousa, Radas, Gvozdenovic, Arapi; Shkëmbi, Lika, Lilaj, Orelesi, Sefa; Pejic;

Në rast se Skënderbeu kalon në xhiron e tretë të kualifikime të Ligës së Kampionëve, aty e pret si kundërshtar, fituesi i përballjes: Shakhter Karagandy-BATE Borisov.