Testet e fundit për Kosovën para ndeshjeve vendimtare parakualifikuese

Përfaqësuesja e Kosovës në basketboll sot dhe nesër do të zhvillojë dy ndeshje miqësore përgatitore me Shqipërinë, si teste të fundit para ndeshjeve zyrtare parakualifikuese për në Eurobasket 2021.

Të drejtuar nga Damir Mulaomerovic, basketbollistët e Kosovës së fundi janë mposhtur dy herë në miqësore nga Sllovakia, që u zhvilluan në Bratisllavë.

Dueli i parë ndaj Shqipërisë zhvillohet sonte në ora 19:00, ndërsa i dyti nesër mbrëma në ora 18:00, ka bërë të ditur FBK-ja përmes një njoftimi.

E keqja është se miqësorja do të jetë e mbyllur për publikun, derisa adhuruesit e basketbollit nuk do të kenë mundësi t’i shohin lojtarët në testet e fundit me përfaqësuesen para ndeshjeve zyrtare, ku Kosovën e presin Luksemburgu dhe Britania e Madhe.

Kosova duhet të fitojë grupin parakualifikues ndaj Luksemburgut dhe Britanisë së Madhe për të fituar rastin të luajë në kualifikime për Eurobasket 2021.

E aty, e pret një grup me fuqitë botërore të basketbollit: Gjermania, Franca dhe Mali i Zi.