Teuta fiton, Kukësi barazon

TEUTA FITON

Teuta e Durrësit ka arritur që të shënojë fitore në ndeshjen e parë të raundit të parë kualifikues për Europa League 2013/14. Durrësakët kanë shënuar fitore 3-1 ndaj Dacias së Chisinaut nga Molldavia. 

Daniel Xhafaj (29’) ka qenë ai që ka hapur serinë e golave për djemtë e detit, por rusi Vasiliy Pavlov (38’) ka arritur të barazojë shpejtë për molldavët. 

Mirëpo, në pjesën e dytë djemtë e Gugash Maganit kanë dalë me një frymë tjetër dhe kanë arritur të shënojnë edhe dy herë për të shënuar fitore me rezultat 3-1. Golashënues kanë qenë Albi Dosti (68’) dhe Bledar Mancaku (73’). 

KUKËSI BARAZON SI MYSAFIR

Kukësi në anën tjetër ka debutuar në garat europiane me barazim si mysafir në Estoni. Djelmoshat e Armando Cungut kanë arritur të gjejnë barazimin në minutën e 79-të me anë të golit të Gerard Prognit, pasi që skuadra Flora nga Talini kishte udhëhequr në minutën e 11-të me anë të golit të Sander Post-it. 

Kosovarët që luajnë në skuadrën e Kukësit Yll Hoxha dhe Besar Musolli kanë qenë pjesë e formacionit bazë. Musolli ka luajtur tërë ndeshjen, ndërsa Hoxha është zëvendësuar në minutën e 78-të të ndeshjes. 

LAÇI DËSHTON NË FUND

Skuadra e vetme shqiptare që ka dëshpëruar sonte ka qenë ajo e Laçit. Djelmoshat e Stavri Nicit janë mposhtur nga skuadra e Luksemburugt, Differdange, 0-1, në ndeshjen e zhvilluar në stadiumin Skënderbeu të Korçës. 

Skuadra nga Luksemburgu ka shënuar golin e vetëm të ndeshjes në momentet e fundit të takimit (84’) me anë të mesfushorit Phillipe Lebresne. Kosovari që luan për këtë skuadër Dejvid Sinani, nuk është futur në ndeshje për asnjë minutë dhe ka qëndruar për 90 minuta në bankën rezervë të skuadrës nga Luksemburgu. 

KOSOVARI SHPËTON TETEKSIN

Kosovari Genc Iseni ka arritur të shënojë golin më të rëndësishëm për ekipin e tij, Teteks nga Tetova. Iseni ka shënuar në minutën e fundit të takimit ashtu që ekipi i tij të mos dalë humbës si vendas nga ekipi armen, Pyunik. Për skuadrën nga Tetova përveç kosovarit Iseni, edhe mbrojtësi shqiptaro-maqedon, Egzon Bejtullai, ka luajtur 90 minuta. 

Ndeshjet e kthimit të Europa League luhen pas një jave dhe me mundësi të madhe pritet që Teuta e Kukësi, të kalojnë në raundin e dytë, derisa Laçi tani do të ketë punë më të vështirë pas humbjes së pësuar sonte.