VAR edhe në Ligën e Parë

Federata e Futbollit të Kosovës po e shqyrton seriozisht mundësinë e instalimit të sistemit VAR edhe në Ligë të Parë të Kosovës.

Pas mbajtjes së mbledhjes së Komitetit Ekzekutiv të FFK-së pardje, është thënë se për shkak të dobisë që po sjellë VAR, po diskutohen mundësitë që ajo të implementohet edhe në Ligë të Parë në sezonin e ardhshëm.

Ndërsa, FFK nuk e ka mënjënuar opsionin se ajo mund të përdoret edhe në ndonjë ndeshje të rëndësishme të këtij stinori në Ligë të Parë.

“KE analizoi rrjedhën e deritashme të garave duke konstatuar se garat po rrjedhin mjaft mirë, ndërkaq që aplikimi i sistemit të VAR-it u vlerësua si shumë i dobishëm që reflektoi siguri, duke mënjanuar gabimet eventuale, për të hequr dilemat te futbollistët, gjyqtarët, trajnerët dhe të adhuruesit. Pra kjo ka dhënë kontribut të madh në mbarëvajtje jashtëzakonisht të mirë të garave. Prandaj KE diskutoi që të krijohen mundësitë që sistemin VAR ta fillojë ta aplikojë edhe në Ligën e Parë nga kampionati i ardhshëm e pse jo në ndonjë ndeshje me rëndësi edhe në këtë Kampionat, por kjo kërkon një analizë të gjithanshme,” është thënë në njoftimin e botuar nga FFK.