Vërejtje të vogla, shpresohet në vendim pozitiv

Dy ditë pas ndeshjes së Superkupës së Kosovës mes Dritës dhe Prishtinës, ndeshje që ishte e para e luajtur në stadiumin e ri “Fadil Vokrri”, ende nuk është marrë vendimi përfundimtar nga UEFA sa i përket licencimit të stadiumit.

Siç dihet, kjo ndeshje ishte një lloj testi për futbollin kosovar në mënyrë që të vendoset se a është stadiumi i sapo-renovuar i gatshëm plotësisht si në aspektin infrastrukturor, ashtu edhe në atë organizativ, që t’i plotësojë kriteret e kërkuara nga shtëpia evropiane e futbollit dhe rrjedhimisht përfaqësuesja e Kosovës ndeshjet e Ligës së Kombeve gjatë muajit të ardhshëm t’i luajë në ‘shtëpi’ apo jo, varësisht nga vendimi i zyrtarëve të UEFA-së.

Në një artikull të botuar nga Koha Ditore sot, thuhet që përkundër vërejtjeve të vogla, vendimi për licencim të stadiumit pritet të jetë pozitiv.

Shitja e biletave në ‘treg të zi’, tollovia e krijuar rreth stadiumit para ndeshjes e ndezja dhe hedhja e fishekzjarrëve ishin disa nga vërejtjet e zyrtarëve të UEFA-së sa i përket ndeshjes, por megjithatë zyrtarët e FFK-së citohet të kenë thënë se edhe pse përgjigje zyrtare nuk kanë marrë ende, ata besojnë se stadiumi do të licencohet.

Sa i përket vendimit final, ai do të bëhet i ditur gjatë kësaj jave.